Niufala gavman blong Praem Minista Jeremiah Manele hemi tude lonchim National Ant-Corruption Strategy 2024kasem 2027 blong faet agensim enikaen korapsin wea hem bikfala problem long Solomon Islands distaem.
And nomata Gavman hem kamap finis wanfala Anti-Coccuption Act long 2018 wea hem setem ap disfala Anti-Corruption Commission fo faet agensim everi form blong korapsen, korapsin hem gogohet olsem nomol samting nomoa.
Long lonch blong National Ant-Corruption Strategy tude ia, Praem Minista Jeremiah Manele hem se disfala aksin plan blong gavman blong hem, bae hem kavarem korapsin insaet long gavman and praevet sekta wetem sapot blong olketa komiuniti.
Mr Manele hem se korapsin hem nogut fo evriwan long kantri...bat faet agensim korapsin hem no waka nomoa blong olketa Gavman agency, hem samting wea evriwan long Solomon Islands mas help fo faet agensim.
Wanfala long olketa gavman agency wea hem save traem hard fo faet agensim korapsin long kantri nao hem Royal Solomon Islands Police Force, and dastawea Deputy Commissioner blong National Security and Operations, Ian Vaevazo hem talem ABC niusmere, Chrisnrita Leong se olketa hapi tumas long displa lonch blong Gavman strategy ia.
General Secretary blong Solomon Islands National Youth Congress, Josie-Anne Ashley hem se disfala strategy bae hem helpem waka blong olketa tu thru long olketa provincial youth council go kasem long olketa ward komiti long saet long faet agensim korapsin.
Image Details
At launch of SIG Anti-Corruprion Strategy 2024-27